ސެއިންޓް ޕީޓާސްބާގް ސްޓޭޑިއަމް

ވެމްބްލީ ސްޓޭޑިއަމް

ޔޫރޯ ފުޓުބޯޅަ މުބާރާތުގެ ބައެއް މެޗުތައް މި އަހަރު ކުޅޭ ލަންޑަންގެ ވެމްބްލީ ސްޓޭޑިއަމް އަލުން އިމާރާތް ކުރުމަށް ފަހު ހުޅުވީ 2007 ވަނަ އަހަރު އެވެ. އެއީ އިނގިރޭސި ވިލާތުގެ އެންމެ ބޮޑު ސްޓޭޑިއަމް އަދި ޔޫރަޕްގައި ދެ ވަނަ އަށް އެންމެ ބޮޑު ސްޓޭޑިއަމެވެ. ޔޫރޯ 2020 ގެ އަށް މެޗު ވެމްބްލީގައި ކުޅޭނެ އެވެ. އޭގެ ތެރޭގައި ފައިލް މެޗާއި ސެމީ ފައިނަލް ދެ މެޗު ހިމެނެ އެވެ.

ބާކޫ އޮލިމްޕިކް ސްޓޭޑިއަމް

އާޒަބައިޖާންގެ ވެރިރަށް ބާކޫގެ އޮލިމްޕިކް ސްޓޭޑިއަމް ފެބްރުއަރީ 2015 ގައި އިމާރާތްކޮށް ނިންމައި ހުޅުވާފައި ވަނީ މާޗް 6، 2015 ގަ އެވެ. ސްޓޭޑިއަމްގެ ބިންގާ ޖޫން 6، 2011 ގައި އެޅީ އަޒަބައިޖާންގެ ފުޓުބޯޅަ އަށް 100 އަހަރު ފުރުން ފާހަގަކުރުމަަށް ބޭއްވި ޚާއްސަ ރަސްމިއްޔާތުގަ އެވެ. މި އަހަރުގެ ޔޫރޯގެ ގްރޫޕް ސްޓޭޖުގެ ތިން މެޗާއި ކުއާޓާ ފައިނަލް މެޗެއް ބާކޫ ސްޓޭޑިއަމްގައި ކުޅޭނެ އެވެ.

ސްޓާޑިއޯ އޮލިމްޕިކޯ

އިޓަލީގެ ވެރިރަށް ރޯމްގެ އެންމެ ބޮޑު ސްޓޭޑިއަމް، ސްޓާޑިއޯ އޮލިމްޕިކޯ އަލުން އިމާރާތް ކުރީ 1990 ވަނަ އަހަރުގެ ވޯލްޑް ކަޕް ފުޓުބޯޅަ މުބާރާތަށެވެ. އިޓަލީގެ ނޭޝަނަލް އޮލިމްޕިކް ކޮމިޓީގެ ބެލުމުގެ ދަށުގައިވާ ސްޓާޑިއޯ އޮލިމްޕިކޯ އަކީ ރޯމާ އާއި ލާޒިއޯގެ ހޯމް ސްޓޭޑިއަމް ވެސް މެ އެވެ. މިފަހަރުގެ މުބާރާތުގެ ހަތަރު މެޗު ރޯމްގެ އޮލިމްޕިކް ސްޓޭޑިއަމްގައި ކުޅޭނެ އެވެ. އޭގެ ތެރޭގައި ކުއާޓަ ފައިނަލް އެއް މެޗު ވެސް ހިމެނެ އެވެ.

ކްރެސްޓޯވްސްކީ ސްޓޭޑިއަމް

ރަޝިޔާގެ ސެއިންޓް ޕީޓަސްބާގުގެ ކްރެސްޓޯވްސްކީ ސްޓޭޑިއަމް، ސްޕޮންސަޝިޕް ސަބަބުތަކަށްޓަކައި މަޝްހޫރުވެފައި ވަނީ ގެޒްޕްރޮމް އެރީނާގެ ގޮތުގަ އެވެ. ފުރާޅު ކަހާލެވޭ ގޮތަށް ހަދާފައިވާ ސްޓޭޑިއަމް ހުޅުވާފައި ވަނީ 2017 ވަނަ އަހަރުގެ ފީފާ ކޮންފަޑެރޭޝަން ކަޕަށެވެ. ފީފާ ވޯލްޑް ކަޕް 2018 ގެ ހަތް މެޗު އެ ސްޓޭޑިއަމްގައި ކުޅުނެވެ. މިފަހަރުގެ ޔޫރޯގެ ހަތް މެޗު ވެސް އެ ސްޓޭޑިއަމްގައި ކުޅޭނެ އެވެ.

އަލިއަންޒް އެރީނާ

މިއުނިކުގެ އަލިއަންޒް އެރީނާ އަކީ ޖަރުމަނުގެ ދެ ވަނަ އަށް އެންމެ ބޮޑު ސްޓޭޑިއަމް އެވެ. ފައިނޭންޝަލް ސާވިސް ޕްރޮވައިޑާ އަލިންޒް އިން ސްޓޭޑިއަމްގެ ސްޕޮންސަޝިޕް 30 އަހަރަށް ގަނެފައިވީ ނަމަވެސް ފީފާ އާއި ޔުއެފާގެ މެޗުތަކުގައި ސްޓޭޑިއަމްގެ ނަން އެ ގޮތަށް ބޭނުމެއް ނުކުރެވޭނެ އެވެ.

ޕުސްކަސް އެރީނާ

ހަންގޭރީގެ ބުޑަޕެސްޓުގެ ޕުސްކަސް އެރީނާ އަލުން އިމާރާތް ކުރަން ފެށީ 2017 ވަނަ އަހަރު އެވެ. ފީފާ އާއި ޔުއެފާގެ މިންގަނޑުތަކާ އެއްގޮތަށް ހަދާފައިވާ ސްޓޭޑިއަމަށް ނަންދީފައި ވަނީ ހަންގޭރީގެ ކުރީގެ ފުޓުބޯޅަ ކެޕްޓަން ފެރެންސް ޕުސްކަސް އަށް ނިސްބަތްކޮށެވެ.

އެސްޓާޑިއޯ ލަ ކާޓުހާ ޑި ސެވިއްޔާ

ގިނަ ކުޅިވަރުތަކެއް ކުޅެވޭ ގޮތަށް ހަދާފައިވާ ސްޕޭނުގެ ސެވިއްޔާގެ އެސްޓާޑިއޯ ލަ ކާޓުހާ ހުޅުވާފައި ވަނީ 1999 ވަނަ އަހަރުގެ ވޯލްޑް އެތުލެޓިކްސް ޗެމްޕިއަންޝިޕަށެވެ. ސެވިއްޔާގެ ސްޓޭޑިއަމަށް މި ފަހަރުގެ ޔޫރޯ މެޗުތައް ބަދަލު ކުރީ، ކޮވިޑް-19 އާ ގުޅިގެން ބިލްބާއޯ ސްޓޭޑިއަމްގައި މެޗުތައް ބޭއްވުމުގެ ޝަރުތުތައް ފުރިހަމަ ނުވުމުންނެވެ.

އެރީނާ ނޭޝަނަލް

ރުމޭނިއާގެ ވެރިރަށް ބުކަރެސްޓުގެ އެރީނާ ނޭޝަނަލް އަލުން އިމާރާތް ކުރުމަށް ފަހު ހުޅުވާފައި ވަނީ 2011 ވަނަ އަހަރު އެވެ. ރުމޭނިއާގެ ގައުމީ ފުޓުބޯޅަ ޓީމުގެ މެޗުތައް ކުޅުމުގެ އިތުރުން އެއީ ޑައިނަމޯ ބުކަރެސްޓުގެ ހޯމް ސްޓޭޑިއަމް ވެސް މެ އެވެ. ފުރާޅު ކަހާލެވޭ ގޮތަށް ހަދާފައިވާ މި ސްޓޭޑިއަމަކީ ޔުއެފާ ގެޓަގަރީ ހަތަރެއްގެ ސްޓޭޑިއަމެކެވެ.

ޖޯހަން ކްރައިފް އެރީނާ

ނެދަލޭންޑްސްގެ ވެރިރަށް އެމްސްޓެޑަމްގެ ޖޯހަން ކްރައިފް އެރީނާ އަކީ އެ ގައުމުގެ އެންމެ ބޮޑު ސްޓޭޑިއަމެވެ. އެމްސްޓެޑަމް އެރީނާގެ ނަމުން މަޝްހޫރު ސްޓޭޑިއަމްގެ ނަން ޖޯހަން ކްރައިފް އެރީނާގެ ނަމަށް 2018-2019 ގެ ފުޓުބޯޅަ ސީޒަނުގައި ބަދަލުކުރީ ނެދަލެންޑްސްގެ ފުޓުބޯޅަ ލެޖެންޑް ޖޯހަން ކްރައިފްގެ ނަމާ ގުޅުވައިގެންނެވެ.

ހެމްޑަމް ޕާކް

ސްކޮޓްލެންޑުގެ ގްލާސްގޯގެ ހެމްޑަމް ޕާކަކީ އެ ގައުމުގެ އެންމެ ދުވަސްވީ ކްލަބު ކްއީންސް ޕާކުގެ ހޯމް ސްޓޭޑިއަމެވެ. ޔުއެފާ ކެޓަގަރީ ހަތަރެއްގެ މި ސްޓޭޑިއަމްގައި މީގެ ކުރިން ވަނީ ޔޫރަޕުގެ ބޮޑެތި މުބާރާތްތަކުގެ ފައިނަލް މެޗު ކުޅެފަ އެވެ. މި ފަހަރުގެ ޔޫރޯ މުބާރާތުގެ ހަތަރު މެޗު ހެމްޑަމް ސްޓޭޑިއަމްގައި ކުޅޭނެ އެވެ.

ޕާކަން ސްޓޭޑިއަމް

ޑެންމާކުގެ ކޯޕެންހޭގަންގެ ޕާކެން ސްޓޭޑިއަމް އަލުން އިމާރާތްކޮށް ނިންމާފައި ވަނީ 1992 ވަނަ އަހަރު އެވެ. ޔުއެފާގެ ހަތަރު ތަރީގެ ސްޓޭޑިއަމް ލިސްޓްގައި ޕާކެން ހިމަނާފައި ވަނީ 1993 ވަނަ އަހަރު އެވެ. ފުރާޅު ކަހާލެވޭ ގޮތަށް ހަދާފައިވާ ސްޓޭޑިއަމްގައި މީގެ ކުރިން ވަނީ ބޮޑެތި ކޮންސެޓްތައް ވެސް ބާއްވައިފަ އެވެ.